Tadbir O‘zbekiston Respublikasi Prezidenti huzuridagi Boshqaruv samaradorligi agentligi, O‘zbekiston Respublikasi Adliya vazirligi hamkorligida BMT Taraqqiyot dasturi (UNDP) tomonidan amalga oshirilayotgan, Yevropa Ittifoqi tomonidan moliyalashtiriladigan “O‘zbekistonda davlat xizmatlari ko‘rsatishni yanada takomillashtirish” loyihasi doirasida tashkil etildi.

Seminar-treningning asosiy maqsadi davlat organlari xodimlarining ma’lumotlarga asoslangan qaror qabul qilish ko‘nikmalarini rivojlantirish, katta hajmdagi ma’lumotlar (Big Data) tahlili, zamonaviy raqamli vositalar hamda sun’iy intellekt texnologiyalaridan samarali foydalanish bo‘yicha amaliy bilim va tajribalarini oshirishdan iborat.

Tadbirning ochilish marosimida O‘zbekiston Respublikasi Adliya vazirligi, Boshqaruv samaradorligi agentligi, Yevropa Ittifoqining O‘zbekistondagi Delegatsiyasi hamda BMT Taraqqiyot dasturining (UNDP) O‘zbekistondagi vakolatxonasi vakillari ishtirok etdi.

Uch kunlik o‘quv dasturi ishtirokchilarga ma’lumotlarni yig‘ish, tozalash, tahlil qilish va vizuallashtirishning to‘liq siklini amaliy mashg‘ulotlar orqali o‘zlashtirish imkonini berdi.

Dasturning birinchi kunida ishtirokchilar Google Sheets, Microsoft Excel va Power Query orqali ma’lumotlarni qayta ishlash usullarini o‘rgandilar.

Ikkinchi kunida esa Power BI hamda Apache Superset platformalarida tahliliy dashboardlar yaratish, ma’lumotlarni to‘g‘ri talqin qilish va vizualizatsiya qilishning zamonaviy yondashuvlari muhokama qilindi.

Seminarning uchinchi kuni sun’iy intellekt vositalari, xususan Claude platformasidan tahliliy yordamchi sifatida foydalanish, davlat sektorida ma’lumotlar xavfsizligi va shaxsiy ma’lumotlarni muhofaza qilish talablari, shuningdek, ishtirokchilarning amaliy loyihalari taqdimotiga bag‘ishlandi.

Trening yakunida ishtirokchilar haqiqiy davlat ma’lumotlari asosida ishlab chiqilgan tahliliy mahsulotlar — dashboardlar, yozma hisobotlar hamda sun’iy intellekt yordamida tayyorlangan amaliy yechimlarni taqdim etdilar. Ushbu ishlar ekspertlar tomonidan baholandi.

Mazkur xalqaro seminar-trening davlat xizmatchilarida raqamli tahlil ko‘nikmalarini rivojlantirish, ma’lumotlarga asoslangan boshqaruv madaniyatini keng joriy etish va davlat boshqaruvida sun’iy intellekt hamda Big Data texnologiyalaridan samarali foydalanishni qo‘llab-quvvatlashga xizmat qiladi.