Davlat fuqarolik xizmati sohasiga axborot-kommunikatsiya texnologiyalarini keng joriy etish va ularni izchil takomillashtirib borish, davlat fuqarolik xizmatchilari shaxsiy maʼlumotlarining xavfsizligini taʼminlagan holda ular to‘g‘risidagi maʼlumotlar bazasini shakllantirish Davlat xizmatini rivojlantirish agentligining asosiy vazifalaridan biridir.

O‘zbekiston Respublikasi Vazirlar Mahkamasining 2023 yil 22 sentyabrdagi “Respublika va mahalliy ijro etuvchi hokimiyat organlarida inson resurslarini boshqarish tizimini takomillashtirish chora-tadbirlari to‘g‘risida”gi 492-sonli qarori bilan hrm.argos.uz elektron platformasi ishga tushirildi. Mazkur platforma inson resurslarini rivojlantirish yo‘nalishidagi byurokratik to‘siqlarga chek qo‘yish hamda korrupsiyaviy xavf-xatarlar va inson omilini qisqartirish maqsadida ishlab chiqildi.

Endilikda kadrlarga oid ish yurituv hujjatlari elektron raqamli imzo bilan tasdiqlangan holda faqat tizim orqali elektron shaklda qabul qilinadi va yuritiladi.

Platforma Davlat fuqarolik xizmatchilari vakant lavozimlarining yagona ochiq portali — vacancy.argos.uz hamda Yagona milliy mehnat tizimi — my.mehnat.uz elektron dasturlari bilan integrallashgan.

Mazkur avtomatlashtirilgan tizim davlat fuqarolik xizmati tatbiq etiladigan barcha davlat organlari va tashkilotlarida to‘liq joriy etilmoqda. Hozir kunda barcha davlat fuqarolik xizmati tatbiq etiladigan vazirlik va idoralar, shuningdek, ular tizimidagi 2 800 dan ortiq tashkilot ushbu platformaga ulangan.

hrm.argos.uz axborot tizimining ishga tushirilishi natijasida davlat organlari va tashkilotlarida inson resurslarini boshqarishda qog‘oz sarfining kamayishi, vaqtning tejalishi, xodimlar bilan ishlash jarayonida shaffoflikni taʼminlanishiga erishiladi. Shuningdek, axborot xavfsizligini taʼminlanishi hamda davlat organlari va tashkilotlarining barcha xodimlari bo‘yicha yagona markazlashtirilgan maʼlumotlar bazasini shakllantirish imkoniyati yaratiladi.